អង្គការហ្គូដណេប៊ឺសកម្ពុជា – លិខិតឆ្លងទៅកាន់អនាគតល្អរបស់កុមារកម្ពុជា

យោងតាមអង្គការយូនីសេហ្វ កុមារកម្ពុជាយើងនៅមិនទាន់ទទួលបានការសិក្សាល្អតាមស្តង់ដានៅឡើយទេ។ ចំនួនសិស្សថ្នាក់បឋមសិក្សាដែលមិនទាន់ចេះអានសសេរនៅមានចំនួនច្រើន (២៥ ភាគរយនៃចំនួនសរុប) សិស្សានុសិស្សអាយុចន្លោះពី ៣ឆ្នាំ ទៅ ៥ឆ្នាំដែលមានសមត្ថភាពអាចរាប់លេខ និងអានអក្សរបានមានចំនួនត្រឹមតែ ២៧ភាគរយ ហើយចំនួនសិស្សយុវវ័យអាយុខ្ទង់ ១៧ ឆ្នាំដែលសម្រេចចិត្តបោះបង់ការសិក្សាចោលមានដល់ទៅ ៥៥ ភាគរយឯណោះ។

កន្លងមកសកម្មភាពពង្រឹងវិស័យអប់រំរបស់អង្គការហ្គូដណេប៊ឺសកម្ពុជាបានជះឥទ្ធិពលយ៉ាងទូលំទូលាយលើសហគមន៍អភិវឌ្ឍន៍ទាំង ៦ លើផ្នែកជាច្រើនរួមមានផ្នែកសិទ្ធមនុស្ស ផ្នែកសុខភាព ផ្នែកគាំពារកុមារ ផ្នែកសុខុមាលភាពសង្គម ផ្នែកអប់រំ និង ផ្នែកជំនាញវិជ្ជាជីវៈ។ ម្យ៉ាងវិញទៀតវាក៏បានធ្វើអោយប្រជាជនក្នុងតំបន់មានការរីកចម្រើនផងដែរ។ ដំណើរការក្នុងការអភិវឌ្ឍន៍តំបន់ដាច់ស្រយាលក្នុងប្រទេសកម្ពុជាអោយឃ្លាតឆ្ងាយពីបញ្ហាប្រឈមនៅតែជាគោលដៅចម្បងរបស់ពួកយើងនៅក្នុងជំពូកទី១នៃឆ្នាំ២០២៣នេះ។

បន្ទាប់ពីបានសិក្សាលំអិតអំពីតម្រូវការចំបាច់ និងតម្រូវការបន្ទាប់បន្សំរបស់អ្នកភូមិនៅជនបទ និងបន្ទាប់ពីមានកិច្ចប្រជុំពិភាក្សាជាមួយគណៈកម្មាធិការអភិវឌ្ឍន៍មូលដ្ឋាន យើងកំណត់បានថាប្រជាពលរដ្ឋក្នុងសហគមន៍អភិវឌ្ឍន៍របស់យើង ជាពិសេសកុមារនឹង មានជីវិតរស់នៅកាន់តែល្អ ហើយមានអនាគតប្រសើរជាងមុន បើពួកគេអាចទទួលបានប្រព័ន្ធអប់រំដែលល្អត្រឹមត្រូវ។ ឃើញដូចនោះក្រុមការងារអភិវឌ្ឍន៍របស់យើងបានធ្វើការវិភាគអំពីប្រភពបញ្ហា និងលទ្ធផល ដើម្បីយកទៅធ្វើជាសំអាងសម្រាប់ពង្រីក និងពង្រឹងកម្មវិធីសិក្សានៅក្នុងតំបន់គោលដៅទាំងអស់នោះ។ ជាលទ្ធផលយើងបានសេចក្តីសរុបថា ការផ្គត់ផ្គង់ទូលំទូលាយលើច្រើនផ្នែកអាចជួយស្រោចស្រង់ដល់សង្គមអោយចៀសផុតពីបញ្ហារាំងស្ទះលើការសិក្សាមិនល្អក្នុងសហគមន៍។

ការចុះធ្វើអន្តរាគមន៍

ដើម្បីបង្កើតអោយបាននូវសុភមង្គល និងសុខមាលភាពដល់សហគមន៍តាមគោលនយោបាយសាធារណៈ វាទាមទារអោយមានការគាំទ្រ និងផ្គង់ផ្គង់យ៉ាងពេញលេញដល់ពលរដ្ឋសហគមន៍ក្នុងតំបន់គោលដៅដែលត្រូវការជំនួយ ត្រូវការកម្លាំងចិត្តដ៏ប្រសើរ និងព័ត៌មានគ្រប់គ្រាន់ ដើម្បីយកទៅបង្កើតអោយចេញជាដំណោះស្រាយក្នុងការឆ្លើយតបនឹងផលលំបាកនៃកង្វះការអប់រំ។

ពួកយើងបានធ្វើការចុះទស្សនកិច្ច ដើម្បីណែនាំអំពីកម្មវិធីជំនួយ ហើយបង្កើនការយល់ដឹងអំពីការអប់រំ និងបំផុសចំណង់ចំណូលចិត្តចំពោះការសិក្សារៀនសូត្រ។ អង្គការហ្គូដណេប៊ឺសកម្ពុជា មិនត្រឹមតែអនុវត្តគម្រោងហេដ្ឋារចនាសម្ព័ន្ធធំៗ ដូចជាផ្តល់អគារសិក្សា និងការសាងសង់បណ្ណាល័យប៉ុណ្ណោះទេ ពួកយើងក៏បានជួយផ្គង់ផ្គង់លើផ្នែកដែលជួយជម្រុញសកម្មភាពសិក្សាផងដែរ រួមមានការបង្កើតអោយមានបរិយាកាសសិក្សាកក់ក្តៅមានផាសុខភាព ការជួយជាសម្ភារៈដើម្បីអាចចូលរៀនបាន ហើយតម្រូវការចាំបាច់ ដើម្បីរីកលូតលាស់រីកចម្រើនយ៉ាងរីករាយផ្សេងៗទៀត។ លើសពីនេះទៅទៀតយើងក៏មានកម្មវីធីអាហារូបករណ៍ ដើម្បីជួយដល់ក្មេង និងយុវជនលើគ្រប់ទម្រង់ និងបែបបទនៃការអប់រំរួមទាំងថ្លៃសិក្សា កម្មវិធីអភិវឌ្ឍន៍ កម្មវិធីសិក្សាសម្រាប់យុវតី និងសម្ភារៈសម្រាប់ទំនុកបម្រុងការសិក្សាជាច្រើនផ្សេងទៀត។ ពួកយើងបានចែកអាហារ និងដឹកជញ្ជូនជំនួយដែលយើងបានរៀបរាប់ខាងលើ ដល់កុមារកម្ពុជាក្នុងកម្រិតផ្សេងៗគ្នាមានទាំងសិស្សក្នុងកម្រិតថ្នាក់មេតេ្ដយ្យ ថ្នាក់បឋមសិក្សា និងថ្នាក់វិទ្យាល័យ។ គណៈកម្មការអភិវឌ្ឍន៍សង្កេតឃើញថា កម្មវិធីជំនួយរបស់ពួកយើងមានប្រសិទ្ធខ្ពស់និងមានឥទ្ធិពលយូអង្វែងចំពោះប្រព័ន្ធអប់រំប្រទេសកម្ពុជា ដូច្នេះហើយទើបឥឡូវនេះយើងនាំគ្នាបន្តធ្វើដំណើរដើម្បីអនុវត្តន៍នៅតាមសហគមន៍អភិវឌ្ឍន៍ផ្សេងទៀតពីកន្លែងមួយទៅកន្លែងមួយយ៉ាងសកម្ម។

សមិទ្ធិផលការងារ
ដំណើរការផ្តល់ជំនួយដើម្បីជួយពង្រឹងប្រព័ន្ធអប់រំក្នុងត្រីមាសទី១នេះត្រូវបានបញ្ចប់គួរឱ្យកត់សម្គាល់ និងគួរជាទីរីករាយមួយ ដោយព្រោះយើងអាចសម្រេចគ្រប់យ៉ាងបានតាមការគ្រោងទុក។ អង្គការហ្គូដណេប៊ឺស ម្ចាស់ជំនួយ និងភាគីពាក់ព័ន្ធបានសម្រេចនូវការផ្លាស់ប្តូរល្អមួយសម្រាប់កុមារកម្ពុជា។ សិស្សានុសិស្សក្នុងសហគមន៍ពេលនេះមានខ្នងបង្អែកសម្រាប់ពឹងពាក់ក្នុងការកសាងអនាគតភ្លឺស្វាងបានដោយគ្មានមន្ទឹលសង្ស័យ និងការភ័យព្រួយបារម្ភ។ លទ្ធផលចំបងនៃវិស័យអប់រំដែលអង្គការហ្គូដណេប៊ឺសកម្ពុជាសម្រេចបាននៅក្នុងដើមឆ្នាំ ២០២៣ នោះគឺកម្មវិធីផ្តួចផ្តើមបង្ករអោយមានការយល់ដឹងអំពីការសិក្សាក្នុងសហគមន៍អភិវឌ្ឍន៍កោះញែក។ ពួកយើងបានរៀបចំវគ្គបណ្តុះបណ្តាលជាមួយប្រជាជនក្នុងតំបន់ចំនួន ៣៤០ នាក់មកពីភូមិចំនួន៧ផ្សេងៗគ្នា។ អាណាព្យាបាលដែលមិនបានបញ្ជូនកូនទៅសាលារៀនពីមុនបានសម្រេចចិត្តចូលរួមបង្កើតការផ្លាស់ប្តូរដ៏ល្អជាមួយយើងព្រោះពួកគេបានយល់ដឹងថាការសិក្សាពិតជាមានសារៈសំខាន់សម្រាប់អនាគតរបស់កុមារ។ ពួកយើងសប្បាយរីករាយជាមួយលទ្ធផលដែលទទួលបានហើយ យើងនឹងខិតខំបន្ថែមទៀតដើម្បីឃើញការផ្លាស់ប្តូរបែបនេះកើតមានឡើងជាមួយម្តាយឪពុករបស់ក្មេងៗនៅក្នុងភូមិផ្សេងៗទៀត។ តាំងពីដំបូងរហូតមកទល់ខែមីនាឆ្នាំ ២០២៣ ពលរដ្ឋចាប់ផ្តើមបើកចិត្តអោយការអប់រំ ហើយកម្មវិធីជំនួយលើវិស័យអប់រំរបស់អង្គការហ្គូដណេប៊ឺស បានពង្រីកឡើងកាន់តែធំ និងត្រូវបាននាំយកមកអនុវត្តន៍ជាបន្តបន្ទាប់ ជាប្រចាំនៅតាមសាលារៀននានាក្នុងឃុំកោះញែក។ យើងខ្នះខ្នែងដើម្បីបានឃើញភាពជោគជ័យនាពេលអនាគតរបស់កុមារក្នុងសហគមន៍កោះញែក។

1.កម្មវិធីឧបត្ថម្ភកុមារ
នៅក្នុងប្រទេសកម្ពុជាកុមារមិនអាចទទួលការអបររំល្អបានមិនមែនដោយសារតែកត្តាខ្វះកំលាំងជំរុញចិត្តអោយស្រលាញ់ការសិក្សាតែមួយមុខតែប៉ុណ្ណោះនោះទេ កង្វះលទ្ធភាពដើម្បីផ្គត់ផ្គង់ការសិក្សាក៏ជាកត្តាចាំបាច់មួយដែលរារាំងពួកគេពីការសិក្សាល្អផងដែរ។ ជាពិសេសសម្រាប់អ្នកដែលមកពីគ្រួសារដែលមានកម្រិតជីវភាពខ្សត់ខ្សោយ ដូចច្នេះហើយទើបអង្គការហ្គូដណេប៊ឺសកម្ពុជាបានបង្កើតកម្មវិធីឧបត្ថម្ភដើម្បីជួយជ្រុំជ្រែង និងគាំទ្រការរៀនសូត្ររបស់គាត់ជាបន្តបន្ទាប់។ ពួកយើងប្រកាស និងបើកទទួលកុមារងាយរងគ្រោះអោយចុះឈ្មោះធ្វើជាសិស្សអាហារូបករណ៍ដែលពួកគេនឹងទទួលបានការទំនុកបម្រុង និងការមើលថែទាំពីយើងយ៉ាងខ្ជាប់ខ្ជួន។ កុមារដែលត្រូវបានយើងជ្រើសរើសទទួលបាននូវការផ្គត់ផ្គង់ទាំងផ្នែកហិរញ្ញវត្ថុ និងផ្នែកបច្ចេកទេសជាប្រចាំខែដែលក្នុងនោះរួមមាន កញ្ចប់ថវិកាសម្រាប់ការធ្វើដំណើរទៅសិក្សា កញ្ចប់សម្រាប់ទិញសម្ភារៈសិក្សា និងការចំណាយប្រចាំថ្ងៃដែលជាតម្រូវការដើម្បីសម្រេចបាននូវភាពជោគជ័យក្នុងការសិក្សា។ លើសពីនោះទៅទៀត ដើម្បីធ្វើអោយគ្រប់យ៉ាងកាន់តែមានប្រសិទ្ធភាព នៅក្នុងជំពូកទីមួយនៃឆ្នាំ២០២៣ ពួកយើងបានរៀបចំកម្មវិធីការប្រជុំជំនួបជាមួយមាតាបិតាសិស្ស និងការចុះទស្សនកិច្ចដល់សហគមន៍ជាញឹកញាប់ ក្នុងគោលបំណងណែនាំពីកម្មវិធីជំនួយ ក៏ដូចជាពង្រឹងការយល់ដឹងអំពីប្រយោជន៍នៃការអប់រំទៅកាន់អាណាព្យាបាល។

2.កម្មវិធីគាំទ្រ និងលើកទឹកចិត្តអោយចូលរៀន
គាំទ្រនិងលើកទឹកចិត្តអោយចូលរៀនសំដៅដល់ការផ្តល់ការយល់ដឹងសមស្រប ក៏ដូចជាការលើកទឹកចិត្តអោយស្រលាញ់ការអប់រំដែលមានប្រសិទ្ធភាព និងក្នុងពេលវេលាដែលត្រឹមត្រូវ។ ជំនួយនេះផ្តួចផ្តើមអោយមានការចាប់ផ្តើមប្រតិបត្តិ ហើយជួយទ្រទ្រង់មនសិការៀនសូត្រ និងអនុវត្តរបស់សិស្សានុសិស្ស។ ក្រោមជំនួយរបស់អង្គការ ជី អាយ ហ្សិត យើងបានផ្តល់សម្ភារៈ និងគ្រឿងបរិក្ខារដែលអាចការពារកុមារពីបញ្ហាសុខភាពទៅកាន់កុមារក្នុងកម្រិតមេតេ្តយ្យសិក្សានៅក្នុងស្រុកចំនួន ៦ ផ្សេងគ្នារួមមានដូចជាស្រុកអូរជ្រៅខេត្តបន្ទាយមានជ័យ ស្រុកថ្មរគោលនិងស្រុកឯកភ្នំខេត្តបាត់ដំបង ស្រុកស្នួលខេត្តក្រចេះ ស្រុកកោះញែកខេត្តមណ្ឌលគិរី និងខណ្ឌដង្កោររាជធានីភ្នំពេញ។ សកម្មភាពសប្បុរសនេះបានជះឥទ្ធិពលវិជ្ជមានដោយប្រយោលដល់កុមារ និងប្រព័ន្ធសិក្សានៅក្នុងសហគមន៍បានយ៉ាងល្អប្រសើរ ពីព្រោះសុខភាពល្អនាំអោយមានការសិក្សាល្អ។

3.ថ្នាក់បំប៉ន

សិស្សនៅក្នុងតំបន់ជនបទ និងតំបន់ដាច់ស្រយាលប្រឈមជាមួយបញ្ហាមានពេលវេលាតិចតួចបំផុតនៅក្នុងថ្នាក់ផ្លូវការ។ ដើម្បីប្រាកដចិត្តថាកុមារនិងយុវជននៅក្នុងសហគមន៍របស់យើងមានការសិក្សាដែលមានលក្ខណៈសម្បត្តិគ្រប់គ្រាន់ និងត្រឹមត្រូវតាមតម្រូវការជាក់ស្តែង ពួកយើងបានដាក់បញ្ចូលកម្មវិធីថ្នាក់បំប៉នចូលក្នុងកម្មវិធីជំនួយដែលនឹងផ្តល់ឳកាសអោយពួកគេបានស្វែងយល់ រំលឹកមេរៀន និងបានអនុវត្តន៍បន្ថែមលើមុខវិជ្ជាគោល ដូចជាគណិតវិទ្យា អក្សរសាស្ត្រខ្មែរ ភាសារអង់គ្លេស អង្គការហ្គូដណេប៊ឺសកម្ពុជាបានផ្គត់ផ្គង់ថ្នាក់កុំព្យូទ័រ ថ្នាក់ចំណេះដឹងទូទៅ និងថ្នាក់ថែទាំគាំពារផ្សេងៗទៅកាន់សិស្សានុសិស្សដែលបានចុះឈ្មោះ។ ឧទាហរណ៍កាលពីខែមីនាថ្មីៗនេះ យើងមានការអប់រំលើកកម្ពស់សុខភាពប្រកបដោយផលិតភាពសម្រាប់ក្មេងស្រីថ្នាក់ទី ៦ ដើម្បីយល់ពីនិយមន័យនៃវ័យជំទង់ ការផ្លាស់ប្តូររាងកាយ និងអារម្មណ៍ និងការមករដូវ និងអនាម័យនៅពេលមានបម្រែបម្រួល។ សិស្សនារីវ័យក្មេងមកពីសាលាបឋមសិក្សាចំនួនពីរក្នុងខណ្ឌដង្កោររាជធានីភ្នំពេញដែលបានមកចូលរួមទាំង ១០៤ រូបបានយល់ដឹងនិងទទួលបានការអប់រំអំពីចំនុចគួរកត់សម្គាល់ និងហេតុការណ៍ដែលនឹងអាចកើតមានឡើងនាពេលខាងមុខបានយ៉ាងល្អប្រសើរ។ យើងរំពឹងថាក្រៅពីផ្តល់ព័ត៌មាន កម្មវិធីនេះនឹងផ្តល់ចំណេះដឹងអំពីហានិភ័យ និងកត្តាគួរចៀសវាងផ្សេងៗទៀតទៅកាន់យុវតី (អាកប្បកិរិយាដែលមានហានិភ័យខ្ពស់ ហានិភ័យនៃការមានផ្ទៃពោះដោយមិនបានគ្រងទុក និងសកម្មភាពដែលបង្ករគ្រោះថ្នាក់)។

ករណីសិក្សាពិសេស
សិស្សឈ្មោះ ជីម រដ្ឋា អាយុ ១៧ឆ្នាំ សិក្សាថ្នាក់ទី ៩។ ប្អូន ជីម រដ្ឋា រស់នៅក្នុងក្នុងភូមិទួល ឃុំបួនលើ ស្រុកកោះញែក ខេត្តមណ្គលគិរី។ នាងជាសិស្សអាហារូបករណ៍របស់អង្គការហ្គូដណេប៊ឺសកម្ពុជាក្នុងកម្មវិធីនិស្សិតជនជាតិដើមភាគតិចនៅក្នុងឆ្នាំ ២០២១–២០២២។

គ្រួសាររបស់ប្អូន ជីម រដ្ឋា ប្រឈមជាមួយបញ្ហាផ្នែកហិរញ្ញវត្ថុដែលធ្វើអោយម្តាយឪពុករបស់នាងចំបាច់ត្រូវសម្រេចចិត្តចាកចេញទៅរស់នៅកន្លែងផ្សេង បែកគ្នាពីកូនៗដើម្បីរកប្រាក់ចំនូលមកផ្គត់ផ្គង់គ្រួសារ។ ម្តាយឪពុករបស់ប្អូន ជីម រដ្ឋា ធ្វើការជាកម្មករប្រចាំថ្ងៃអោយចំការចេកមួយក្នុងស្រុកលំផាត់។ កុមារី ជីម រដ្ឋា មិនដែលមានចិត្តគិតចង់បោះបង់ការសិក្សារបស់នាងសូម្បីម្តងបើទោះបីគ្រួសាររបស់នាងមានភាពលំបាកតោកយាកយ៉ាងនេះក៏ដោយ។ ដើម្បីការសិក្សានាងសុខចិត្តចាកចេញពីផ្ទះទៅរស់នៅក្នុងអន្តេវាសិកដ្ឋានរបស់សាលាបឋមសិក្សាសុខសាន្ត ខណៈពេលដែលម្តាយឪពុករបស់នាងជាប់រវល់បំពេញភារកិច្ចការងារមិនអាចនៅឬមើលថែទាំនាងបានដិតដល់។

វាជាសំណាងល្អមួយដែលអង្គការហ្គូដណេប៊ឺកម្ពុជាបានធ្វើដំណើរទៅជួបជាមួយប្អូនស្រីហើយស្របពេលដែលកម្មវិធីជួយឧបត្ថម្ភកុមារក្នុងថ្នាក់ទី ៩កំពុងបើកទទួលសិស្សចុះឈ្មោះថ្មី។ ប្អូនជីម រដ្ឋា បានចុះឈ្មោះហើយត្រូវបានយើងជ្រើសរើសជាសិស្សអាហាររូបករណ៍ម្នាក់ក្នុងចំណោមសិស្សទាំង ១៥ នាក់ដែលត្រូវបានជ្រើសរើសអោយមកទទួលបានការផ្គត់ផ្គង់គាំទ្រលើថ្លៃធ្វើដំណើរទៅសាលារៀន ថ្នាក់បំប៉ន និងការឧបត្ថម្ភជាសំភារៈសិក្សាផ្សេងៗទៀតជាប្រចាំពីអង្គការហ្គូដណេប៊ឺសកម្ពុជា។ ក្រោយពេលបានក្លាយជាសិស្សអាហារូបករណ៍ចំណេះដឹងរបស់ប្អូនស្រី ជីម រដ្ឋា មានការរីកចម្រើនយ៉ាងគួរអោយកត់សំគាល់ ហើយទទួលបានលទ្ធផលល្អ ក្នុងវគ្គប្រឡងផ្តាច់ព្រ័ត្រដោយទទួលបានចំណាត់ថ្នាក់ល្អប្រសើរ (កម្រិតB) នៅក្នុងថ្នាក់រៀនរបស់នាងទៀតផង។

បច្ចុប្បន្នប្អូនស្រី ជីម រដ្ឋា ជាសិស្សពូកែជាងគេក្នុងកម្មវិធីអាហារូបករណ៍របស់អង្គការហ្គូដណេប៊ឺសកម្ពុជា។ នាងបានផ្តល់សម្ភាសន៍ថា “ខ្ញុំសូមថ្លែងអំណរគុណយ៉ាងជ្រាលជ្រៅចំពោះអង្គការហ្គូដណេប៊ឺសកម្ពុជាដែលបានជ្រើសរើសខ្ញុំអោយចូលរួមកម្មវិធីឧបត្ថម្ភនេះ។ ខ្ញុំគិតថាការសិក្សារបស់ខ្ញុំមានភាពរីកចម្រើនទៅមុខ ពីព្រោះតែជំនួយនិងការផ្គត់ផ្គង់យ៉ាងពេញលេញរបស់ម្ចាស់ជំនួយនិងអង្គការ។ នេះជាការជួយដ៏ពិតប្រាកដ ហើយវាបានលើកទឹកចិត្តខ្ញុំអោយខិតខំប្រឹងប្រែងរៀនសូត្រកាន់តែខ្លាំងជាងមុន ជាប្រចាំនិងបានយ៉ាងទៀងទាត់។ ខ្ញុំនឹងបន្តខិតខំរៀនសូត្រអោយបានល្អប្រសើរជាងមុនដើម្បីសម្រេចបាននូវក្តីស្រមៃដែលខ្ញុំបានប៉ុនប៉ងទុក។ នាងបន្តនិយាយទាំងទឹកមុខញញឹមញញែមថាខ្ញុំនឹងខំរៀនអោយបានពិន្ទុល្អក្នុងថ្នាក់វិទ្យាល័យ ដើម្បីមានឳកាសអាចបន្តការសិក្សាដល់ថ្នាក់សាកលវិទ្យាល័យ”។ ចុះក្រោយនាងនិយាយថា “ខ្ញុំសូមថ្លែងអំណរគុណទៅកាន់ម្ចាស់ជំនួយដែលបានផ្តល់ឳកាសអាហាររូបករណ៍នេះមកកាន់សិស្សក្នុងថ្នាក់ទី ៩ដូចជាខ្ញុំ។ ខ្ញុំសង្ឃឹមថាគម្រោងនេះនឹងនៅតែបន្តកើតមានឡើងជាយូអង្វែងនៅក្នុងសហគមន៍របស់ខ្ញុំ ដើម្បីធានាថាសិស្សដែលងាយរងគ្រោះនៅក្នុងតំបន់លំបាកដូចជាយើងទទួលបានឱកាសដើម្បីបន្តការសិក្សាបានខ្ពស់ខ្ពស់”។ បច្ចុប្បន្ន ប្អូនស្រី ជីម រដ្ឋា កំពុងសិក្សាក្នុងថ្នាក់ទី ១០ “A” ក្នុងវិទ្យាល័យកោះញែក។

សុភាសិត  
“ដោយសារមានការសហការល្អពីដៃគូ និងអ្នកជួយជ្រុំជ្រែង យើងបានជួយកុមារនិងយុវជនកម្ពុជាអោយមានភាពរីកចម្រើនលើជំនាញអក្ខរកម្ម និងចំណេះដឹងមូលដ្ឋានដែលផ្តល់ប្រយោជន៍ល្អទៅកាន់ជីវិតពួកគេផ្ទាល់ ក៏ដូចជាអនាគតរបស់សហគមន៍ទាំងមូល”។